Almannaheill, samtök þriðja geirans, hafa valið Tinnu Björnsdóttur sem sjálfboðaliða ársins 2024. Valið á sér stað í tilefni af Degi sjálfboðaliðans í dag, fimmtudaginn 5. desember.

Tinna er ein af öflugum sjálfboðaliðum Hugarafls. Hún er virk og öflug í stjórn félagsins og dugleg að láta rödd sína heyrast.

Tinna heldur utan um starf kvennahóps Hugarafls – en sá hópur en einn sá fjölmennasti og best sótti innan félagsins.

Notendur Hugarafls sjá góða fyrirmynd í Tinnu og leita mikið til hennar.  Hún nýtir eigin reynslu til að hjálpa öðrum en passar á sama tíma vel upp á sjálfa sig og eigin mörk.

Tómas Ingi Torfason, formaður Almannaheilla, heimsótti Tinnu í húsnæði Hugarafls í dag, afhenti henni viðurkenninguna og sagði nokkur orð.

„Tinna er með hlýja og nærandi nærveru, stóran faðm og gerir ekki upp á milli fólks.  Hún lífgar upp rýmið fyrir alla,“ sagði hann.

Hugarafl eru félagasamtök fólks sem hefur upplifað persónulega krísu og vinnur að persónulegum bata sínum. Við erum stærstu grasrótarsamtök fólks með andlegar áskoranir á Íslandi og látum rödd okkar heyrast varðandi geðheilbrigðismál. Félagið var stofnað árið 2003.